Конвојот во Бергамо ги вознемири социјалните мрежи: Војската мора да ги пренесува починатите од коронавирус (ВИДЕО)
Снимка од италијанскиот град Бергамо, кој сега е еден од најпогодените градови од епидемијата на коронавирусот, ги вознемири социјалните мрежи. На видеото може да се забележат десетина воени камиони кои пренесуваат ковчези на починати лица во неколку крематориуми во северниот дел на Италија.
Italian Army took the coffins out from Bergamo for cremation pic.twitter.com/6u2GM63FxL
— Amichai Stein (@AmichaiStein1) March 19, 2020
Во регионот Ломбардија, поради општиот карантин, погребите се спроведуваат без церемонии.
Најголемата компанија за огранизација на погреби во овој регион ја објасни ситуацијата, велејќи дека камионите на војската биле повикани на помож за превоз на ковчезите, бидејќи крематориумот во Бергамо бил преполн и немало место.
– Вообичаено имаме 120 погреби. Сега цела генерација ни почина во две недели. Никогаш не сме виделе вакво нешто – изјави Антонио Рикарди, претседателот на погребалната компанија.
Според пишувањата на медиумите, во градот Бергамо има 80 погребни компании, а секоја од нив примала по најмалку 12 повици за еден час.
Италија е најтешко погодената земја од епидемијата на коронавирусот по кинескиот град Вухан, а во земјата досега од болеста починаа 2.978 лица.
Според податоците до 10 часот, во светот досега се регистрирани 220.313 луѓе заразени со новиот коронавирус. Од нив починати се 8.983, а оздравеле 85.769.