Манифестацијата „Скопско лето“ со своето 42. издание ќе биде затворена на 30 јули со концертот насловен „Вода“ на Давор Јордановски и неговиот бенд. Концертот ќе се одржи во Куршумли-ан, со почеток во 21 часот.

Музиката на „Вода“ е вешто изработен спој на заводливи балкански мелодии со џез, фанк, класични и рок стилови. Изведувачи на концертот се Давор Јордановски – клавијатури, Алек Секуловски – тапани, Огнен Георгиевски – електричен бас, Оливер Јосифовски – контрабас, Сања Шуплевска – виолина, Орце Зафировски – фагот, Александар Јовевски – кавал и тамбура, а специјални гости се групата „Љубојна“ и вокалниот солист Васил Гарванлиев.

Познатиот пијанист, композитор и продуцент, Давор Јордановски и неговата група „Вода“, го нурнуваат слушателот во древни звучни предели, обмислени со модерен вкус. Покрај разновидноста во инструментацијата и интелигентно распоредените ритмички варијации, музиката на „Вода“ се одликува и со динамична и течна инструментација и звук. „Вода“ се храни од својата околина и зазема форма во контекстот на она што се изведува, отелотворувајќи, истовремено, спокој, чистота, промена, моќ и бес – исто како, и самата вода.

Давор Јордановски е роден и пораснал во Македонија, живее во Канада, а поминал и неколку години во Либија, како дете. Впечатоците од живеењето во таа култура остануваат со него додека расте во неговиот роден град Скопје, каде е под влијание на музиката од Балканот и Европа.

Во Канада, синтезата на музичките култури во музиката на Давор еволуира во уникатен стил, „world fusion“ што успешно обединува бесконечен спектар на разновидни звуци, инструменти, аранжмани и чувства. Давор своето класично музичко образование го продолжува и надградува со истражување на разни музчики стилови, како поп, џез, Р&Б, музика за филм, џез-фјужн, амбиентална, како и музика за симфониски оркестар.

Концертот ќе се одржи согласно протоколите за одржување културни настани во време на пандемија.