„Комунална хигиена“ не подига мрши од домашни миленици, сопствениците сами се снаоѓаат
Во првите шест месеци од годинава, по пријава на граѓани, од јавните површини на Скопје, ЈП „Комунална хигиена“ подигнала 20 мрши од умрени улични животни. Но, доколку на некој граѓанин му умре миленик, тогаш ќе мора да го закопува во двор, по падините на Водно или во околината на Скопје, што е недозволено и казниво, но во градов нема друг начин за сопственикот да се ослободи од мршата на животното.
Таква услуга не нуди ниту „Комунална хигиена“, затоа што како што велат не е во нивна надлежност.
Претпријатието има надлежност за собирање мрши исклучиво од јавни површини, не се врши собирање од домовите на граѓаните. Телата на умрените животни со специјално возило се транспортираат до депонијата „Дрисла“, каде што се одлагаат во посебна јама за оваа намена – објаснуваат од „Комунална хигиена“.
На актуелните локални избори ниту еден од кандидатите не се сети да понуди решение за овој проблем, кој ги мачи десетиците илјади сопственици на миленици.