Комисијата за заразни болести препорачува изолацијата на пациентите позитивни од Ковид-19 да се намали од десет дена на седум дена, изјави министерот за здравство Беким Сали за ТВ Сител.

-На денешната седница, која беше свикана по барање на министерот за здравство, членовите на Комисијата одговорија позитивно и се состанавме. На тој состанок се разговареше, и секако врз основа на следењето на трендот на одлуки кои се донесени во различни држави, кои се релевантни и се земаат за пример за споредување, и врз основа на нашиот Институт за јавно здравје кој ги добива на дневна база податоците, одлуката на Комисијата е изолацијата од десет дена да се намали на седум дена, изјави Сали.

Тој рече дека оваа одлука не е конечна и во идниот период состојбата со новозаразени ќе се следи и соодветно ќе се носат препораки и одлуки.

Оваа препорака на Комисијата треба да се најде на Кризниот штаб во понеделник, а во вторник веќе треба да биде на седницата на Влада.