Колку плаќавме за бензин и дизел пред пандемијата
Светската здравствена организација прогласи пандемија на 11 март 2020 година, а последните цени на бензинот утврдени од страна на Регулаторната комисија за енергетика пред тој датум беа за 13,5 денари пониски отколку што е новата цена која ќе важи од ноќеска на полноќ. Што се однесува до дизелот, неговата цена пред пандемијата беше помала за 13 денари.
На 9 март 2020 година цената на „еуросупер БС 95“ била 62 денари, а од ноќеска на полноќ ова гориво ќе се точи по цена од 75,5 денари. Цената на „еуросупер БС 98“ била 64 денари, а сега ќе биде 77,5 денари. Дизелот пак бил 54,5 денари, а новоутврдената цена изнесува 67,5 денари.
Она што може да се забележи од објавената структура на цената од страна на Регулаторната комисија, главниот виновник за поскапувањето е набавната цена. Таа за бензините се зголемила за околу 11 денари, а за дизелот речиси 10 денари. Но, зголемената набавна цена која заедно со другите елементи влегува во даночната основица, практично го зголемила и износот на данокот на додаден вредност.
Акцизата за бензините останала речиси иста -22 денари за литар и има мала нагорна корекција на акцизата за дизелот од 15,135 денари за литар на 15,5 денари. Освен овие давачки кон државата, во цената влегува и давачката за задолжителни резерви и надоместок за заштита на животна средина и овие трошоци не се променети. Не е променет ни трошокот што му се признава на трговецот за транспорт од склад до бензинска прумпа, додека трговска маржа и трошок за складирање претрпеле сосема мали измени во децималите.