Колинда по истекувањето на мандатот ќе го искористи правото на плата и канцеларија
Често ме прашуваат за канцеларијата, јас мислев дека нема да ја земам, но сега некако размислувам дека таа е еден вид на база ако сакате да вршите сериозна работа – рече Грабар-Китаровиќ.
Претседателката на Хрватска Колинда Грабар-Китаровиќ, според сознанијата на Нова ТВ, по истекот на мандатот ќе го искористи правото на шест месеци полна и шест месеци половина претседателска плата.
Таа најави и дека ќе земе канцеларија.
– Често ме прашуваат за канцеларијата, јас мислев дека нема да ја земам, но сега некако размислувам дека таа е еден вид на база ако сакате да вршите сериозна работа – рече Грабар-Китаровиќ. Право на канцеларија има во следните пет години.
„Претседателката треба да ја искористи таа канцеларија за промоција на Хрватска, таа сепак е позната во светот – и тоа има некаква смисла. Она што нема смисла е некој доживотно да ја има право на ваква канцеларија – коментираше пратеникот на Мост, Никола Грмоја.
Со канцеларијата, поранешните претседатели во Хрватска имаат право и на: два државни службеници, возач, возило, но и на осигурување кое може да го користат трајно.
„Тоа што ќе продолжам да го правам е брендирање на Хрватска, промовирање на нашите интереси, решавање на некои општествени прашања, злоупотреби општо…“, рече Колинда.
Грабар-Китаровиќ официјално нема доставено барање за оваа канцеларија до надлежната институција.