Која пиперка е најздрава, зелената, црвената или жолтата?
Кај нас и во светот постојат различни сорти пиперки, но откако ќе постигнат одреден степен на зрелост, тие се или зелени, или жолти, или црвени.
Иако бојата ќе им биде различна, сепак пиперките важат за едни од најздравите плодови што ни ги дала природата и токму затоа се препорачува да се јадат секојдневно.
Во составот на пиперките има голем број витамини и минерали и што е многу важно – растителни влакна.
Но, она што треба да се напомене е дека и покрај тоа што сите пиперки се здрави, сепак во различниот стадиум на зреење тие имаат различни прехранбени вредности.
Имено, зелената пиперка всушност е недозреана, па концентрацијата на витамини кај неа е најмала во споредба со пиперките што се жолти или црвени.
Жолтите пиперки веќе достигнале одреден степен на зреење и со тоа имаат и поголеми количества витамини. Има сорти на пиперки, кои последниот стадиум од зреењето им е во жолта боја.
На крај, кога пиперката конечно ќе добие интензивна црвена боја, во тој случај таа изобилува со големи количини витамин Ц како и секундарни растителни масла. Сето ова ја прави црвената пиперка најздрава за јадење.