Заради превенција од ширење на коронавирусот и заштита на странките кои се должни да присуствуваат на расправите во судот, јавноста доследно да ги почитува препораките на Владата на Македонија и на Министерството за правда и доколку не е неопходно да не влегуваат во судот.

Надлежниот судија или судечкиот совет, зависно од просторните услови во судницата и однесувањето на присутните, може согласно законските одредби да го ограничи бројот на присутна јавност во судницата. За секое непочитување на препораките судот ќе покрене соодветна постапка согласно членовите 205 и 206 од Кривичниот закон на Македонија, стои во соопштението кое на неколку локации, меѓу нив и на влезот на Кривичниот суд во Скопје се известува јавноста за личната заштита и спречување на можното ширење на коронавирусот меѓу присутните во судот.

Од вчера во Основниот суд Скопје 1 воведени се поригорозни хигиенски мерки, не само за вработените во судот, туку и за странките кои влегуваат во овој објект. Задолжителна е дезинфекција на рацете за сите лица кои влегуваат во објектот, а судската полиција со маски на лицето и заштитни ракавици ги прегледува сите странки. Засега за медиумите и за претставниците на невладините организации кои ја следат работата на овој суд не е воведена забрана за присуство, согласно вчерашната препорака која ја даде министерката за правда, Рената Дескоска. Токму Дескоска вчера изјави дека сите препораки кои досега се упатени до сите државни органи и други институции важат и за судовите.

– Во однос на режимот на работа, судовите и понатаму остануваат во групата на сите останати државни институции – министерства, фондови, управи и други државни институции кои продолжуваат со работа со преземање на сите мерки за претпазливост за заштита од вирусот – посочи таа.