Кој не е вакциниран или нема ПЦР тест не може да си го искористи ваучерот за Грција
Масовната и брза вакцинација во нашата земја, ќе биде пресудна за тоа кој прв ќе се „распостели“ на некоја од лежалките на Егејското море.
Во агенциите велат дека граѓаните веќе се јавуваат да ги потврдат уплатените аранжмани, иако стравуваат дали ќе се имунизираат до почетокот на летната сезона. Добрата вест е што лани уплатените ваучери ќе може да се искористат до крајот на оваа година и има можност да се фати одморот во септември. Од друга страна, оние граѓани, кои не сакаат да се вакцинираат и да вадат ПЦР тестови, ќе немаат можност за замена за друга дестинација и ќе треба да чекаат на поврат на средствата, но дури од јануари идната година. Копиите од сите издадени лански ваучери за одмор во странство, се архивирани и во Министерството за економија.
-Речиси стопроценти од издадените лански ваучери се за Грција, а граѓаните внимателно ги следат информациите од тамошните власти. Нашите закупи се сигурни, ние сме во постојана комуникација со партнерите, бидејќи уплатите ни стојат уште од 2019 и почетокот на 2020 година. Сите се надеваме дека оваа летна сезона ќе биде далеку поуспешна од лани и покрај строгите здравствени протоколи, па затоа очекуваме од Министерството за здравство да дозволи туристичките работници да имаат приоритет за вакцинирање- велат за „Слободен печат“ од туристичката агенција „Игуана“.
Грчкиот министер за туризам Харис Теохарис, пред тамошните пратеници потврди дека ќе ги отворат сите копнени граници на 14 мај, вклучително и за македонските туристи.
Според проценките меѓу 2 и 3 милиони евра, уплатени средства за аранжмани, се врзани во ваучери, најчесто во Грција. Лани биле издадени 12.850 ваучери.