Кој ќе игра против Италија: Англичаните за историско финале, Данците сонуваат реприза од 1992 година
Противникот на Италија во финалето на Евро 2020 ќе биде познат вечерва по одигрување на второто полуфинале во кое ќе се сретнат Англија и Данска.
Селекцијата на Италија вечерва ќе го дознае противникот во финалето на ЕП, на „Вембли“ од 21 часот се среќаваат Англија и Данска која е најпријатно изненадување на првенството.
Овој натпревар за Англија ќе биде историски бидејќи ќе има шанса за прв пат да се пласира во финалето на континеталниот собир. Последен пат во полуфиналето, Англичаните играа 1996 година исто така на домашен терен на „Вембли“ но загубија од Германија по пенал рулетот.
Трагичар на тој натпревар беше актуелниот селектор Гарет Саутгејт, кој сега ќе има можност да го оствари најголемиот успех во кариерата.
– Имаме историска шанса бидејќи никогаш не сме играле во финале на Европско првенство. Нема притисок за фудбалерите, пред нив е уште едно искушение. Данска е добра екипа и не очекува фантастичен натпревар – смета Саутгејт.
Еден од адутите на Англија е цврстата одбрана, „Гордиот Албион“ сè уште нема примено гол на ЕП, а во нападот блескаат Хари Кејн и Рахим Стерлинг кои постигнаа по три гола.
– Данска е одлична екипа, игравме против нив во Лигата на нации минатата година. Мора да се фокусираме на нашата игра, играме на домашен терен и оваа шанса мора да ја искористиме. Знаеме дека е потребно да одиграме фантастично за да се пласираме во финалето – порача Кејн.
Англија ќе има предност на трибините, на „Вембли“ се очекува да има околу 60.000 англиски навивачи бидејќи Владата како дел од мерките за борба против пандемијата на коронавирусот забрани доаѓање на навивачи од странство.
– Чувството е како да играме натпревар на гости, сепак и тоа има некој свој шмек. Се радувае на натпреварот со Англија, среќни сме што ќе има навивачи на „Вембли“ иако би сакал на трибините да има и наши навивачи. Ќе се обидеме да ги замолчиме навивачите, но ќе биде тешко – вели селекторот на Данска, Каспер Хјумланд.
Данска сигурно не е поголема фудбалска нација од Англија, но има поголем резултат на Европските првенства. Додега Англичаните сонуваат европска титула, Данска триумфира во 1992 година кога на турнирот влета како замена за поранешната СФР Југославија. Фудбалерите се надеваат дека ќе успеат да го повторат овој успех и ќе го замолкнат „Вембли“.
– Пред почетокот на ЕП целта ни беше да дојдеме до „Вембли“, а тоа е самата завршница. Оттогаш се случија многу работи, но целта ни остана иста. Подготвени сме за полуфиналето, чувството е неверојатно – порачува репрезентативецот на Данска, Томас Дилејни.