Тренерот на МЗТ Скопје, Ѓорѓи Кочов е среќен по убедливиот триумф од 68:93 на неговите кошаркари во вечното дерби против Работнички.

– Среќен сум што победивме во „Градски Парк“, посебно што победивме во ваква навивачка атмосфера. Не очекував ваква лесна победа и ќе излажам ако кажам поинаку. Задоволен бев од подготовките, не мислев дека вака ќе заврши мечот, но се случува. Бевме агресивни во одбраната и тоа го реши натпреварот, како и пократката клупа на противникот – изјави Кочов.

За разлика од Кочов, тренерот на Работнички, Димитар Мираковски, очекувано е разочаран од играта и резултатот.

– Поразот од дебитантот Академија ФМП не боли колку што нѐ боли неуспехот против најлутиот ривал. Факт е дека формата и квалитетот се на страна на МЗТ Скопје, но не можам да го простам незалагањето на моите кошаркари. Сме имале и три пати послаба екипа од ривалот, па сме го победувале. Можно е да има промени и некои дополнителни засилувања, утре ќе одлучиме што ќе правиме – рече Мираковски.