КНИЖЕВНА ПРОМОЦИЈА: Креативниот процес е најчудесното нешто што може да се случи
Издавачката куќа „Темплум“ на 4 март во МКЦ ја промовираше збирката раскази „Белата е најстрашната боја“ од Ирена Јурчева, добитничка на наградата за најдобар дебитантски прозен ракопис „Новите!“ за 2019 година.
Збирката раскази „Белата е најстрашната боја“ е прва прозна книга на Ирена Јурчева (1982, Белград), која покрај проза пишува и поезија и веќе ја објавила поетската книга „Таинства“ (2017). Работела и како наставник по англиски и француски јазик во повеќе училишта и јазични центри во Скопје, а досега превела повеќе од 15 книги за различни издавачки куќи во Македонија.
– Наградата „Новите!“ како признание за мојата дебитантска збирка раскази не само што е голема сатисфакција за мене, туку и мотивација и поттик да продолжам и понатаму да пишувам со истиот жар и фокус, особено проза. Горда сум што сум добитник на една од најважните книжевни награди за автор-дебитант, чија цел е да ги промовира новите автори во македонската книжевност, како и новите тенденции и пристапи во литературата – истакна Јурчева за „Културен печат“.
Покрај издавачот Никола Гелевски од „Темплум“, на промоцијата се обратија и промоторите Владимир Мартиновски и Мања Величковска. Како член на комисијата што одлучувала за наградата, Величковска објасни дека одлуката за наградата била донесена многу лесно, имајќи ги предвид расказите на Јурчева, кои опфаќаат повеќе теми и типови на нарација, а во содржината носат моменти карактеристични за нашето време и поднебје.
Професорот и писател Владимир Мартиновски образложи дека станува збор за слоевита, зрела и обмислена збирка, која содржи 30-ина раскази. Во однос на насловот „Белата е најстрашната боја“ упати на креативниот страв од бел (празен) лист хартија, бело платно, бел екран, но како поента го цитираше Кандински, кој напишал: „Белата боја нема само естетска, туку и духовна димензија“. Расказите на Јурчева се како „метафора за човекот, кој е празен лист врз кој се испишува животот“, заклучи Мартиновски.
– Со приказните и ликовите од расказите живеев цела година, кога ме носеа низ период во кој доживеав многу промени, предизвици и исчекувања. Во таков период верувам дека од мене излезе најавтентичен и најискрен збор. За мене како автор најинтригантен е насловот и сѐ уште трагам низ себеси за да го пронајдам неговиот извор и да се сетам на мигот на неговото вдахновение. Но, во едно нешто сум сигурна, креативниот процес е најчудното и најчудесното нешто што можеше да ми се случи. Да се соочите со бела страница и да ги излеете врз неа сите бои од сопствената душа, да истапите во новото и непознатото, тоа е еден страшен чин – рече Јурчева на промоцијата на книгата.
Раскази од збирката на промоцијата читаше поетесата Катерина Гогова, а во музичкиот дел настапи групата „Калевала“.
(Текстот е објавен во „Културен печат“ број 21, во печатеното издание на „Слободен печат“ на 7-8 март 2020 година)