Во Универзитетската библиотека во Битола на 19 мај беше промовирана книгата „Стилските фигури во наставата по македонски јазик“ од м-р Мирјана Стојановска. Промотор на книгата беше проф. д-р Даниела Андоновска-Трајковска, фрагменти од книгата читаше Јана Ѓоргиевска, а со музички точки настапи солистот Драган Микаровски.

– Книгата е магистерски труд на Стојановска во која е објавен првиот теоретски дел од овој труд кој опфаќа: историски пристап во развојот на стилските фигури, класификација и објаснување на четириесет изразни средства низ примери во лирски песни и методски решенија за полесно изучување на стилските фигури во наставата по македонски јазик во основно и средно образование. Во недостаток на литература од овој вид се очекува книгата да даде значаен придонес во наставниот процес, како книга-прирачник за наставниците, професорите и учениците – истакна промоторот Трајковска.

Инаку, Мирјана Стојановска е поетеса, автор на девет книги поезија, една книга кратки раскази и е приредувач на пет поетски зборници. Стојановска беше прв претседател на Клубот на писателки „Даница Ручигај“ при Друштвото на писатели на Македонија. Нејзината поезија е преведена на германски и српски јазик и во изминатите години е промовирана на меѓународните саеми на книгата во Франкфурт и во Белград. Објавувањето на новата книга е овозможено со финансиска поддршка на женскиот приватен сектор од Битола, кои самоиницијативно понудиле финасии за печатење и хонорар за авторката.

(Текстот е објавен во „Културен печат“ број 81, во печатеното издание на „Слободен печат“ на 22-24 мај 2021)