Промоцијата на книгата „Несреден век“ од Тихомир A. Јанчовски, што ќе се одржи во Кинотека на Македонија, на 17 октомври, од 12 часот, планирано е да има мултимедијален карактер. Ако времето е убаво, промоцијата ќе биде на отворено, ако не – внатре во Кинотеката.

Промотор ќе биде Тања Аждаја, а на промоцијата песни ќе читаат Оливер Белопета, Добрила Грашеска, Зоран Тортевски, Емилија Пападимитров и Горазд Кени Китановски. Во музичкиот дел ќе настапи групата „Летечки пекинезери“, со визуелен перформанс ќе се претстави Страхил М. Петровски, а специјални гости на настанот ќе бидат членови на групата „Мизар“.

– Средниот век не треба да се сфати само како време од петтиот до петнаесеттиот век, среден век е и средовечната возраст на човекот, откај 35 до 65. А среден век е и обратно од неСреден век, век во кој сѐ е средено и подредено, без неред и хаос. Е сега… кој е мрачен, а кој светол, среден или несреден… јас си знам, а и вие претпоставувате – загатнува авторот на книгата во својата покана до читателите за присуство на промоцијата.

(Текстот е објавен во „Културен печат“ број 101, во печатеното издание на весникот „Слободен печат“ на 16-17 октомври 2021)