Книгата „Куферот на Хана“ ги едуцира децата за холокаустот
Во спомен на жртвите на холокаустот и на кобната Кристална ноќ (9 ноември), која се смета за почеток на погромот и злосторството врз Евреите низ Европа, Меморијалниот центар на холокаустот на Евреите од Македонија ја промовираше книгата „Куферот на Хана“ од Карен Левин.
Наградуваната книга за деца од канадската авторка и новинарка, Карен Левин, на македонски јазик е во издание на „Либи“, дел од „Арс Ламина – публикации“, а е објавена во соработка со Фондот на холокаустот на Евреите од Македонија. Изданието е дел од едицијата „Читанки“ и е наменето за деца над 10-годишна возраст, преку кое, на суптилен образовен начин, ќе се едуцираат за тешката судбина на Евреите и за холокаустот.
„Куферот на Хана“ е необична вистинска приказна што ја оживува историјата на холокаустот и има за цел да ги образова младите читатели за овој мрачен период, кога било извршено едно од најголемите злосторства во историјата кон еден народ.
Карен Левин (родена 1955 година) е канадска радиопродуцентка и писателка. За своите радиодокументарци „Изгубена невиност: Децата од Втората светска војна“ и „Убиство во соседството“ има добиено две награди „Пибоди“, во 1989 и во 2001 година. Повеќе од 30 години има работено за Канадската радиодифузна корпорација („Си-би-си“).
Авторските права за објава на книгата „Куферот на Хана“ се продадени во 40 земји низ светот.
(Текстот е објавен во „Културен печат“ број 106, во печатеното издание на весникот „Слободен печат“ на 20-21 ноември 2021)