Книгата „Кој ќе ги изброи пчелите“ од Енес Халиловиќ е поетски прирачник за очудување на светот

Како дел од издавачката продукција на Здружението за уметност и култура на живеење „Израз“ објавена е книгата „Кој ќе ги изброи пчелите“ од Енес Халиловиќ (1977, Нови Пазар, Србија), еден од најзначајните современи автори во регионот и добитник на наградите „Меша Селимовиќ“, „Бранко Миљковиќ“, „Ѓура Јакшиќ“, „Ахмед Вали“ и други.

Станува збор за концептуална книга во која се објавени стихови од Халиловиќ од неговата прва стихозбирка „Средната буква“ (1995) и последната објавена книга „Бангладеш“ (2019), како еден вид генеза на поетиката на овој автор.

Преведувачката на книгата, Сеида Бегановиќ, македонска писателка, за поетската збирка истакнува дека тоа е прирачник за очудување на светот, имагинарна репортажа напишана од луциден и, пред сѐ, мудар набљудувач на цивилизацијата и човечката природа. Покрај поетските толкувања на темите за основните прашања на филозофската антропологија, поетот во своите стихови го презентира својот оригинален концепт за светот и преку „Манифест на квантумизмот“, опсесивно се обидува да навлезе во тајните на јазикот и на бројот.

Издавањето на книгата е поддржано од Регионалната мрежа за културна разновидност (READ) и ЕУ. Здружението „Израз“ промовира создавање на јазична платформа во малцинските заедници, а првата промоција на книгата се одржа пред жителите на с. Љубин, во скопската општина Сарај, со помош на членовите на книжевниот клуб „Мак Диздар“.

(Текстот е објавен во „Културен печат“ број 102, во печатеното издание на весникот „Слободен печат“ на 23-24 октомври 2021)

Видео на денот