Книга за деца: Средба со приказните за Итар Пејо

Писателот Васил Мукаетов приготви нови интересни содржини за децата. Овој пат станува збор за средба со најубавите шеговити приказни за Итар Пејо, мариовскиот итрец и најпопуларниот јунак на народното усно раскажување во нашето богато културно наследство.

Писанијата во книгата „Мариовски сказни – Пејови приказни“ првично биле зачувани и собрани од познатите истражувачи на македонската усна традиција, како Марко Цепенков (1829-1920) и Кузман Шапкарев до Стале Попов, а сега се стихувани од Васил Мукаетов. „Пејо патува со своето неуморно магаре во својот свет, надитрува и надмудрува, објаснува легенди, исправа неправди, излегува на крај со своите соселани, и тоа секогаш со иста мера – народот го сака својот јунак, а тој, пак, му возвраќа, исто така, со немерлива љубов, со верност и доследност“, открива Мукаетов.

Книгата е објавена во едицијата „Читанка“ на „Либи“, дел од „Арс ламина публикации“. Книгата е препорачана како лесно читливо четиво од Здружението за дислексија „Ајнштајн“ и од Филозофскиот факултет во Скопје.

(Текстот е објавен во „Културен печат“ број 69, во печатеното издание на „Слободен печат“ на 20-21 февруари 2021)

Видео на денот