Во Европа досега се регистрирани близу 16 милиони случаи на заразени со коронавирусот додека во истовреме починаа околу 355.000 луѓе, изјави Ханс Клуге, директор на Светската здравствена организација (СЗО) за Европа и процени дека „рестриктивните мерки би биле непотребни кога 95 проценти од луѓето би носеле маски.

– Сепак, се проценува дека околу 60 проценти од луѓето во Европа носат маски, можеби и помалку, па затоа е тешко да се избегнат рестриктивните мерки, рече Клуге.

Во Европа се евидентирани 28 проценти од пријавените случаи и 26 проценти на смртни случаи, а над 80 проценти од европските земји забележале зголемување на бројот на заразени на 100.000 жители.

– Како резултат на тоа, гледаме здравствени системи пред распаѓање. Франција за само десет дена ги пополни капацитетите за интензивна нега на 95 проценти, а во Швајцарија единиците за интензивна нега се полни. Во последните две недели, бројот на смртни случаи е зголемен за 18 проценти. Ако минатата недела починале 29.000 луѓе, тоа значи дека од коронавирусот во Европа умира по едно лице на секои 17 секунди. Само во ноември беа регистрирани повеќе од четири милиони нови случаи, рече Клуге.

Тој додаде дека со секој избор за почитување на рестриктивните мерки и совети, се намалува ризикот од ширење на ковид-19.

– На овој начин, ние спречуваме загуби на човечки животи. Во моментот, околу 4.500 луѓе умираат секој ден во Европа. Ова може да се избегне. Благодарение на рестриктивните мерки, го намаливме бројот на нови инфекции од повеќе од два милиони случаи на 1,8 минатата недела. Тој напредок е мал, но значаен, рече Клуге.