Клоп и Мурињо удрија по Сити: Срамота, ова е лош ден за фудбалот
Манчестер сити успеа да ја победи УЕФА и нема да биде суспендиран.
Судот за спортска арбитража во Лозана ја прифати жалбата на англискиот тим и му ја укина суспензијата од УЕФА која пак го исфрли од нејзините натпреварувања во наредните две години.
Поништена суспензијата: Манчестер сити ќе игра во Лигата на шампионите
Впечатокот во фудбалската јавност е дека оваа одлука е доказ дека парите го победија фудбалот и ова е крај на финансискиот фер-плеј кој го воведе УЕФА со цел да го запре неразумното трошење на најбогатите фудбалски екипи.
Еден од првите кои ја коментираше одлуката, очекувано е менаџерот на Тотенхем, Жозе Мурињо.
– Ова е срамотна одлука. Затоа што доколку Сити не е виновен, тогаш не треба ниту да биде казнет со 10 милиони фунти. Доколку не си виновен не треба да плаќаш казна. Доколку се виновни, тогаш одлуката исто така е срамна и треба да бидат казнети – порача Мурињо.
И менаџерот на Ливерпул, Јирген Клоп смета дека ова е лоша одлука за фудбалот, но беше доста поумерен од Мурињо.
– Среќен сум што Сити ќе може да игра во ЛШ, но мислам дека вчерашниот ден не беше добар за фудбалот. Мислам дека финансискиот фер-плеј е добра идеја – да ги штити екипите и натпреварувањата. Се надевам дека финансискиот фер-плеј ќе остане на сила бидејќи е добар за фудбалот. Доколку никој не се грижи за трошењето во фудбалот тогаш најбогатите луѓе и држави ќе можат да прават што сакаат – вели Клоп.