Распоредот на Премиер лигата традиционално за божиќните и новогодишните празници е пренатрпан на задоволство на навивачите, додека за тренерите претставува вистинска ноќна мора. Некои екипи ќе мора за помалку од 48 часа да одиграат два натпревари, а најгласни критичари на згуснатиот распоред се Пеп Гвардиола и Јирген Клоп.

– И напишав писмо на Премиер лигата и ѝ се заблагодарив. По натпреварот со Вулверхемптон одиме во ладилник за да се подготвуваме за средбата со Шефилд јунајтед – изјави Пеп Гвардиола кој утревечер со Сити му гостува на Вулверхемптон, а само 46 часа подоцна игра дома против Шефилд.

Клоп и неговиот Ливерпул подобро поминаа во однос на Манчестер сити и има еден ден повеќе за одмор, но сепак застана во одбрана на Гвардиола.

– Ниту еден менаџер нема проблем со тоа да игра на „Боксинг деј“, но да се играат натпревари на 26 и на 28 декември е злосторство. Тоа не е во ред. Ние играме на 26 и на 29 декември и тоа ни доаѓа како празник. Ги разбирам сите што велат дека ова повеќе не смее да се случува. Ми се чини дека можеме да кажеме што сакаме но никој нè не слуша, На телото му е потребно одредено време за да се опорави од напорите. Ова е наука, но целосно се игнорира – изјави Клоп.