Клиперси и официјално имаат нов тренер
Лос Анџелес клиперс го назначи Тајрон Лу за нов тренер на екипата.
Тимот кој во минатата сезона беше еден од главните фаворити за титулата, но беше запрен во конференциското полуфинале, не ги објави деталите од договорот, освен дека Лу треба да биде главен тренер на клиперси во наредните пет години.
Лу во минатата сезона беше асистент на Док Риверс кој доби отказ по крајот на сезоната, и ќе стане 26. тренер во историјата на ЛА Клиперс.
Introducing Head Coach T-Lue.
— LA Clippers (@LAClippers) October 20, 2020
– Ги имаме сите елементи кои се потребни за освојување на титулата – сопственици кои се посветени на таа цел, раководство кое е паметно и елитни кошаркари кои се пример на теренот и надвор од него. Исто така ние сме дел од најдобриот маркет во НБА, односно Лос Анџелес е еден од најомилените градови за играње во оваа лига. Добро ја знам организацијата на клубот, а сега мора напорно да работиме за да дојдеме до титулата – изјави Тајрон Лу.
Пред доаѓањето во ЛА Клиперс, Тајрон Лу од 2016 до 2018 година беше главен тренер на Кливленд кавалирс и во сите три сезони играше во големото НБА финале, а еднаш ја освои титулата.
Како играч, Лу помина 11 сезони во НБА лигата настапувајќи за екипите на ЛА Лејкерс, Њашингтон, Орландо, Хјустон, Атланта, Далас и Милвоки, а со „езерцата“ ја освои и титулата.