Конфедерацијата на слободни синдикати денеска реагираше на предлогот за намалување на платите во јавната администрација. За нив, овој предлог е неприфатлив. Предлагаат да се консултираат експерти и да се носат поприфатливи предлози во оваа ситуација во која државата се справува со коронавирусот.

– Се поставува прашањето како наеднаш стопанството колабира за две недели или истото дишело на шкрги две години. Како буџетот пред две недели беше во топ форма, а сега наеднаш издиша или се држи на шкрги две години. Сега е моментот да погледнеме на вистината во очи, да ја признаеме грешката, нема повеќе простор за манипулација и во интерес на државата и целата нација да се побара помош од целата експертска јавност во државата, се наведува во соопштението од КСС.

Од Синдикатот велат дека нема да прифатат минимална плата и бараат заштита од државата. – Задолжете се, имате начин и можност, но немојте да не деградирате, велат од КСС.

Оттаму изразуваат поддршка до здравствените работници, полицијата, Армијата и до сите вработени во маркетите кои работат во интерес на сите граѓани.