Кјелини прво ќе ве испрати во болница, а потоа ќе ви се извини
Поранешниот италијански репрезентативец, Антонио Касано, смета дека Златан Ибрахимовиќ, е третиот најдобар напаѓач во историјата на фудбалот, додека за Џорџо Кјелини вели дека е личност со две лица, едното на теренот и другото надвор од него.
Ибрахимовиќ и на 39. години ја покажува својата класа, ја препороди екипата на Милан откако во јануари годинава пристигна на „Сан Сиро“, а во новата сезона, „росоњерите“ се лидери во Серија А.
– По феноменот Роналдо и Марко Ван Бастен, мислам дека Златан Ибрахимовиќ е трет најдобар напаѓач во историјата на фудбалот. Тој е најкомплетниот напаѓач што сум го видел – изјави Касано во разговорот со поранешниот колега од репрезентацијата, Кристијан Виери.
Касано имаше интересно мислење и за капитенот на Јувентус, Џорџо Кјелини.
– Џорџо ќе те испрати во болница, а потоа ќе ти се извини. Тој е еден од најдобрите луѓе кои ги познавам во светот на фудбалот, но на теренот тој не познава никого – вели Касано.
