Кирацовски ќе поднесе Предлог-закон, со кој во иднина нема да застаруваат кривичните дела на функционерите
Пратеникот Александар Кирацовски ќе поднесе Предлог-закон, со кој кривичните дела сторени од избрани и именувани функционери нема во иднина да застаруваат, овој негов Фејсбук статус уследи по вчерашното застарувањето на кривичното дело во случајот „Траекторија“, во кој првоосомничен беше поранешниот премиер Никола Груевски.
-Политиката е специфична и комплицирана дејност и наука. Понекогаш во истата, постојат моменти кои за општо добро треба да ги надминете или избегнете, нешта кои треба компромисно да ги решавате, но и работи кои мора да ги спроведете, мора да ги испорачате и кои не смеете да ги пропуштите или испуштите од вид. Правдата, т.е. нејзиното испорачување е токму таква работа и насушна потреба во нашето општество!- пишува Кирацовски на Фејсбук.
Како пратеник во Собранието Кирацовски пишува дека ќе бара поддршка од пратениците во македонскиот Парламент.
-Поднесувам Предлог Закон со кој кривичните дела сторени од избрани и именувани функционери нема да застаруваат. Ќе побарам поддршка од сите 120 колеги пратеници да се приклучат кон ова законско решение и заедно во најбрз можен рок истото да биде изгласано и применето во позитивните законски прописи во државата. Знам дека после се што се случува во нашата држава, ова може ќе звучи иронично, но ПРАВДА МОРА ДА ИМА!“, пишува Кирацовски.