Кинеската амбасадорка во Белград Чен Бо: „Не ја прикриваме епидемиолошката состојба“
Кинеската амбасадорка во Белград Чен Бо ги отфрли обвинувањата дека Кина ја прикрива епидемиолошката состојба и истакна дека тие се лага што се користи со цел да се прикријат податоците за неуспехот на некои земји во борбата против вирусот корона.
„Епидемијата не влијаеше на нашите големи проекти да одат според планот. Кинеската економија повторно бележи позитивен раст, а нашите компании ги надминуваат сите препреки и покрај насилното однесување на Соединетите држави“, изјави амбасадорката, пренесуваат српските медиуми.
Според Чен Бо, соработката помеѓу Кина и Србија активно се одвива во областа на економијата, образованието, културата, туризмот, земјоделството, а соработката во науката и технологијата, особено во областа на новите технологии и иновации, станува отскочна штица за билатерална соработка.
На прашањето како напредува развојот на кинеската вакцина против вирусот корона, кинеската амбасадорка одговори дека четири вакцини влегле во третата фаза.
„Претседателот Си Џинпинг објави дека кинеската вакцина ќе стане глобално јавно добро по конечното одобрување. Ние сме посветени на зајакнување на меѓународната соработка во истражувањето и развојот на вакцините, нивно производство и дистрибуција,“ рече кинеската амбасадорка во Србија.