Кинескиот претседател Си Џинпинг му рекол на севернокорејскиот лидер Ким Џонг Ун дека Кина ќе биде подготвена да работи заедно со Северна Кореја за регионален и глобален мир, стабилност и просперитет, објави севернокорејската државна новинска агенција KCNA, цитирајќи го писмото на Си до Ким.

Државната новинска агенција KCNA не ги спомна неодамнешните ракетни лансирања на Северна Кореја кои ги зголемија тензиите на Корејскиот полуостров по заедничките воени вежби меѓу Јужна Кореја и САД, објави Ројтерс

Американскиот претседател Џозеф Бајден пред 10 дена му укажа на кинескиот претседател Си Џинпинг дека Пекинг има обврска да се обиде да ја одврати Северна Кореја од седмиот нуклеарен тест.

Специјалниот претставник на Јужна Кореја за мир и безбедност на Корејскиот полуостров, Ким Гун, минатата недела побара активна соработка меѓу Кина и Русија за да се спречи Пјонгјанг да продолжи со ракетните тестови, неколку часа пред состанокот на Советот за безбедност на ОН на кој ќе се разговара за ова прашање.