Кина извршува воени вежби во близина на Тајван: Напната ситуација во моментот кога пристигнува специјалната американска делегација
Кинеските власти соопштија дека спроведуваат „борбени вежби” во близина на Тајван на само неколку часа пред денешното пристигнување на поранешни високи претставници на американската администрација во Тајпеј, со чија посета треба да се испрати порака од американскиот претседател Џо Бајден дека е посветен на Тајван и демократијата во таа земја.
Ма Џиаогуанг, портпаролка на канцеларијата на Кинескиот национален совет за Тајван, рече дека воените маневри на кинеската армија се одговор на провокациите и мешањето на странските сили во Тајван.
Официјален Тајпеј повеќепати се жалеше на военото присуство на Кина и на спроведувањето воени вежби, за време на кои кинеските воени авиони честопати влегуваа во воздушниот простор на Тајван, јавија американски медиуми.
Најновиот таков инцидент се случи во понеделникот, кога вкупно 25 кинески борбени авиони, вклучително и бомбардери, способни да носат нуклеарни бомби, влегоа во зоната за противвоздушна одбрана на Тајван.