Роберт Кенеди Џуниор, независен претседателски кандидат од прочуената лоза американски политичари, признал дека пред една деценија фрлил тело на мече во њујоршкиот Централ Парк.

Снимката со признанието е објавена на социјалните мрежи со цел да се пресретне сторија на магазинот „Њујоркер“, чии репортери го истражувале инцидентот.

Седнати на трпезариска маса, Кенеди ѝ раскажува на комичарката Розен Бар дека пред десетина години, додека возел во Хадсон Вели, северно од Њујорк Сити, жена што возела комби пред него удрила во младенче на црна мечка и го убила на место. Кенеди успеал да го префрли мечето во својот автомобил, со намера да му го одере крзното и да го зачува месото, но набрзо се премислил, бидејќи морал да отпатува со авион.

– Во автомобилот имав стар велосипед што требаше да го фрлам. Си реков да ги фрлам и мечето и велосипедот во Централ Парк, за да изгледа како несреќа – рекол Кенеди, додавајќи дека „сигурно ќе му било забавно на тој што ќе ги открие“.

Инцидентот може да е вистинит, бидејќи во октомври 2014 година во грмушки во централниот њујоршки парк било откриено мртво младенче на црна мечка. Полицијата спровела истрага, а експерти утврдиле дека мечето веројатно загинало од удар на автомобил.

Ниту штабот на кампањата на Кенеди ниту магазинот „Њујоркер“ не го коментираа признанието. Рејтингот на Роберт Кенеди Џуниор е стабилен околу 8 отсто, но во многу сојузни држави не ги исполнува минималните услови да биде регистриран како претседателски кандидат на 5 ноември.