Ова лето ќе се одбележат 19 години откако Горан Иванишевиќ сензационално го освои Вимблдон.

Војвотката Кејт Мидлтон тогаш имала 19 години и го обожавала Вимблдон, а го обожавала и Горан Иванишевиќ. Хрватскиот тенисер е единствената личност која ја има освоено титулата на Вимблдон со вајлд карта од страна на организаторот. 

„Отсекогаш следев тенис, а посебно Вимблдон. Англиското лето е незамисливо без тоа натпреварување и тоа отсекогаш беше дел од моето раснење. Го обожавав Горан Иванишевиќ, бев фасцинирана од него, како и од Пит Сампрас, Андре Агаси и Штефи Граф“, рече Кејт на снимањето на документарецот на BBC за Вимблдон.

Иако сега секоја година седи во главната ложа на натпреварите на Вимблдон, за разлика од сегашноста, во тоа време таа била „само обичен граѓанин на Англија“ и не можела да оди на натпревари кога ќе посака.