Англискиот репрезентативец Хари Кејн призна дека водел преговори и со раководството на Манчестер јунајтед во текот на летниот преоден рок.

Сепак, поранешниот фудбалер на Тотенхем сподели дека е среќен поради фактот што избрал да се пресели во германскиот шампион Баерн Минхен.

– Ако треба да бидам искрен, во текот на летото имаше преговори со неколку клубови, но во интерес на вистината Баерн беше клубот за кој секогаш бев заинтересиран. Манчестер Јунајтед е голем клуб, навистина голем клуб, но на крајот решив да дојдам овде и многу сум среќен – рече Кејн.

Конечно во својата професионална кариера искусниот 30-годишен напаѓач има шанса да се бори за големи трофеи.

Тој е еден од најдобрите светски напаѓачи, со Тотенхем успеа еднаш да стигне до финалето во Лигата на шампионите во сезоната 2018/2019, а и двапати беше финалист со истиот клуб во англискиот Лига куп.