Стотици мигранти од Блискиот Исток и од Азија практично се „смрзнуваат“ во кампот „Вучјак“ во Босна и Херцеговина, кадешто веќе има голем недостаток на храна и места за сместување, а доаѓањето на зимата дополнително ќе ја влоши ситуацијата, изјавија хуманитарните работници за „Ројтерс“.

Во БиХ дојде до пораст на бројката на мигранти по затворањето на границите на Хрватска, Унгарија и Словенија за лица кои немаат валидни документи.

Мигрантите во јуни од Бихаќ се префрлени во кампот Вучјак, кој се наоѓа на осум километри од границата на БиХ и Хрватска.

Хуманитарните организации ги повикаа властите во БиХ да го затворат кампот и да побараат подорбо сместување за мигрантите, поради очекуваниот пад на температурите во зимскиот период.

Координаторот на Меѓународната организација за миграција (ИОМ) во БиХ, Питер ван дер Оверарт предупреди дека е јасно оти луѓето ќе умираат доколку не се направи нешто.

– Во спротино, јасно е што ќе се случи. Доколку останат овде во текот на зимата, луѓето ќе умираат за неколку денови или недели, бидејќи температурати рапидно паѓаат – предупреди Ван дер Оверарт.

Повеќе од 40.000 мигранти влегоа на територијата на БиХ од 2018 година, а речиси една петина од нив се деца.

Ван дер Оверарт рече дека во БиХ се наоѓаат околу 7.000 мигранти, и дека таа бројка не би требало да претставува пробелем за земја во која живеат 3,5 милиони луѓе.