Ќе се продава пиштолот на Шон Конери од првиот филм за Џејмс Бонд: Се претпоставува цената да достигне 200.000 долари!
Пиштолот Волтер ПП (Walther PP), кого Шон Конери го користеше во првиот филм за Џејмс Бонд следниот месец ќе биде понуден на аукција во Лос Анџелес. Се претпоставува дека би можел да биде продаден за 200.000 долари.
Конери го користеше тој пиштол во филмот за агентот 007 „Доктор Но“, од 1962 година.
„Силуетата на агентот 007 со пиштол во рака е најпозната слика на целиот серијал и една од најпрепознатливите во поп културата општо“, рече Мартин Нолан, извршниот директор на аукциската куќа Julien’s Auctions.
Во „Доктор Но“, претпоставените му наредија на Бонд да ја замени италијанската Берета со германскиот Волтер.
И во следните 25 филмови, разните верзии на Волтер ќе бидат омилениот избор на Џејмс Бонд.
Освен овој пиштол, на аукцијата ќе бидат понудени уште 499 филмски реквизити, меѓу кои и кацигата што ја носеше Том Круз во „Топ ган“ и кожната јакна на Арнолд Шварценегер од „Терминатор 2“.