По објавата на директорката на УЈП, Сања Лукаревска дека е позитивна на ковид-19, во самоизолација би требало да одат и премиерот Оливер Спасовски и заменичката министерка за внатрешни работи, Славјанка Петровска.

Тие заедно со Лукаревска вчера беа во посета на Куманово, од каде испратија порака дека на 5. јули граѓаните, согласно сите мерки за заштита, ќе го искористат своето право на глас и ќе обезбедат целосно функционални и легитинмни институции.

Лукаревска заедно со Спасовски и кандидатите за пратеници од втората изборната единица имаа работен состанок и прес-конференција во Куманово. Потоа Лукаревска, Спасовски и останатите кандидати за пратеници делеа заштитни маски на граѓаните низ градот.

Oд кабинетот на Спасовски велат дека ги чекаат насоките и препораките на епидемиолозите.

„Штом ги добиеме, ќе постапиме веднаш и во целост согласно протоколите, со избегнување и најмал ризик. Штом ги добиеме препораките од епидемиолозите, веднаш ќе ја известиме јавноста“, велат од Владата.