КЦ 750: Повик за собирање фиќо-приказни
Мобилниот културен центар „КЦ 750“ упати повик за собирање приказни до сите фиќољупци и фиќомани, поранешни, сегашни сопственици на фиќо, како и оние што со фиќото се врзани со некаков спомен. Приказните, анегдотите и сеќавањата, во кои главен протагонист е незаборавната „застава 750“, во форма на текст може да се испраќаат на е-адресата: [email protected], a потоа ќе бидат објавени на фејсбук-страницата на „КЦ 750“.
– Во деновите на изолација и вонредна состојба, кога „КЦ 750“ не може да дејствува на терен како мобилен културен центар, помогнете му да стане виртуелен музеј/архив на приказни – повикуваат од центарот.
Како заеднички проект на Иван Шопов и Владимир Лукаш, „КЦ 750“ е мал, мобилен културен центар. Целта на проектот е развивање и поттикнување нови модели на искористување на јавниот простор за културни намени. Преку мобилниот концепт „КЦ 750“ се обидува на неконвенционален начин да го надополни недостигот на независни културни простори и точки во Скопје.
(Текстот е објавен во „Културен печат“ број 28, во печатеното издание на „Слободен печат“ на 25-26 април 2020)