Католички бискуп кој доби Нобелова награда сексуално злоставувал момчиња во Источен Тимор
Ватикан денеска потврди дека бискупот Карлос Хименез Бело, добитник на Нобеловата награда за мир, е под „дисциплински санкции“ во последните две години поради наводно сексуално злоставување на момчиња во Источен Тимор во 90-тите години на минатиот век.
Портпаролот на Ватикан во соопштение наведе дека канцеларијата која се занимава со случаи на сексуална злоупотреба добила обвинувања „за однесувањето на бискупот“ во 2019 година и дека вовела санкции во рок од една година, пренесува Бета.
Санкциите вклучуваат ограничувања на движење и извршување на должностите, а му се забранува контакт со малолетници или контакт со Источен Тимор.
Во соопштението за печатот на портпаролот Матео Бруни се наведува дека мерките биле „изменети и зајакнати“ во ноември 2021 година и дека Бело формално ја прифатил казната во двата наврати.
Бело ја доби Нобеловата награда за мир во 1996 година заедно со борецот за независност на Источен Тимор, Хозе Рамос-Хорта, за кампања за праведно и мирно решавање на конфликтот во таа земја, додека се бореше да добие независност од Индонезија.