Ракометната репрезентација на Хрватска не успеа да го искористи подарокот од Катар кој ја совлада Аргентина и им овозможи на „коцкестите“ сами да одлучуваат за својата судбина. На крајот, Хрватска доживеа катастрофален пораз од 38:26 од Данска и остана без четвртфинале во кое ќе игра Катар.
Првото полувреме помина во израмнета игра во која најголемата предност изнесуваше два гола и тоа за Данска која на одмор замина со 17:15.
Второто полувреме започна катастрофално за Хрватска, дури осум минути не успеа да најде начин да го совлада голманот Мелер, а за тоа време Данците постигнаа шест гола и ги решија дилемите околу победникот. Хрватите до крајот на натпреварот одиграа катастрофално, постигнаа само четири гола за 20. минути, а вкупно 26 гола на целиот натпревар, додека противникот им ја наполни мрежата давајќи 38 гола.
Најпрецизен во редовите на Данска беше Јакобсен со осум гола, шест даде Холм, а пет Нилсен, додека кај Хрватска Мариќ постигна шест гола, а поранешниот вардарец Игор Карачиќ даде пет гола.

Во последниот натпревар од главната фаза кој немаше натпреварувачки карактер, Полска и Германија одиграа без победник 23:23.
Натпреварите на Мундијалот продолжуваат в среда кога се играат четвртфиналните натпревари и во нив се среќаваат Данска – Египет, Шпанија – Норвешка, Франција – Унгарија и Шведска – Катар.