Металург ги заврши базичните подготовки, во Скопје и во Маврово, а одигра и четири натпревари во склопот на турнирот во Струга.

Главниот тренер на Металург, Зоран Кастратовиќ, е задоволен од досега сработеното и вели дека во преостанатите денови, до почетокот на обврските во Лига Европа, ќе ги стави сите коцки на потребното место.

– Презадоволен сум од сработеното за време на подготовките во Маврово, а исто така и од одиграното во Струга. Видов како функционираме како екипа, каде и што треба да се корегира до мечот со Спачва и сметам дека сме на добар пат. Факт е дека имаме пет нови играчи во тимот и тие не можат за неколку тренинзи и три-четири меча да се навикнат едни на други во начинот на движење на теренот и во стилот на играта. Но, евидентно беше дека во секој нов натпревар имавме напредок во играта. Затоа и верувам дека во следните десетина дена, до мечот со Спачва, ќе ги поставиме сите коцки на потребното место и максимално подготвени ќе влеземе во двомечот – се зборовите на Кастратовиќ на клупскиот сајт.

Металург на традионалниот струшки турнир го освои третото место, со учинок од три победи и еден пораз претрпен од Еурофарм Пелистер.

Првиот дуел со хрватскиот претставник Спачва е закажан за 29 август во салата Автокоманда, а реваншот е за седум дена во Винковци. Подобриот од овој двомечот ќе обезбеди место во второто квалификациско коло од Лига Европа.

Средбата во Скопје е со почеток од 19.00 часот, ќе ја водат судиите Арсим и Ердоан Витаку од Косово, а делегат Ацо Николовски од Македонија.

Реванш дуелот во Винковачко Село, која на програмата е на 5 септември (19.30 часот) ќе ја водат судиите Дору Манеа и Раду Илиеску од Романија, а делегат е Хрватот Владимир Сокол.