Кашманјан: Ништо не е готово, проблем ќе биде топлото време!
Ерменскиот Алашкерт ја одржа својата прес конференција во пресрет на реванш натпреварот в четврток од првото квалификациско коло на Лига Европа во Скопје.
На првиот дуел на домашен терен фудбалерите на Алашкерт славеа со 3:1 против тимот на Македонија Ѓорче Петров. Денеска и ѓорчепетровци предводени од Таневски ги споделија своите очекувања.
Реваншот ќе се игра в четврток (18 јули) на ФФМ Тренинг центарот „Петар Милошевски“ – Скопје со почеток од 16.30 часот. Цената на влезниците е 100 денари, можете да купите билети и онлајн на karti.com.mk
– Ништо не е сменето од аспект на нашиот состав и тактиката во однос на првиот меч. Нашата цел е да се пласираме во следното коло. Ништо не е готово, патникот ќе се дознае по последниот свиреж на реваншот во Скопје. Наше е да одиграме добар фудбал и да одиме на победа. Проблем не само за нас, туку за двете екипи би бил терминот кога започнува мечот (16.30 часот), период кога воглавно преовладува топлото време – беа зборовите на тренерот на Алашкерт, Абрахам Кашманјан.
Српскиот голман на гостите, Огњен Чанчаревиќ вели дека триумфот дома не значи ништо. Свесен дека фудбалот денес нови изненадувања, а како последен пример го одвои шокот на Шкендија која славеше 0:1 против Номе Калју, а вчера изненадувачки загуби 1:2 и доживеа непријатна елиминација од ЛШ.
– Мораме да бидеме концентрирани во текот на мечот, да го дадеме најдоброто од себе и ја оствариме целта. Ја почитуваме екипата на Македонија ЃП, не знаевме многу за нив пред стартот на првиот дуел. Не смееме да ги потцениме – изјави Чанчаревиќ.