Кабастиот отпад како застарен мебел, електричен и електронски отпад граѓаните можат да го одложат во пунктот на ЈП „Комунална хигиена” Скопје, во Карпош 3 долж булеварот Илинден, позади бензинската станица „Макпетрол”, соопшти општина Карпош.

Овој пункт работи од 7.30 до 19 часот секој ден и оваа услуга е без паричен надомест.

Од Општината наведуваат дека кога станува збор за транспорт на кабастиот отпад и негово подигнување од домаќинството, граѓаните можат да контактираат со јавното претпријатие на 0800-222-33. Оваа услуга се наплаќа.

Општина Карпош ги потсетува сите граѓани, правилно и совесно да го одложуваат кабастиот отпад и истиот да не го фрлаат околу контејнерите за комунален отпад.

Комуналните служби на општина Карпош, се вели во соопштението, се во координација со ЈП „Комунална хигиена” за да се спроведе и викенд-акција за подигнување на кабаст отпад. Намерата е да се постават поголеми контејнери на повеќе локации во населбите.

– Сите сме одговорни за чиста општина и заштита на животната средина. Сите информации и контакти во врска со одложувањето на отпадот се поставени на веб страната: https://bit.ly/3doq5py – се додава во соопштението од локалната самоуправа.