Каракачанов со остра порака до Иванов: Молчи си за Македонија!
Откако лидерот на „Демократска Бугарија“, Христо Иванов денеска се обрати во Народното Собрание и кажа дека треба да се најде решение за проблемот со Република Северна Македонија, поранешниот вицепремиер на Бугарија, Красимир Каракачанов, преку социјалните мрежи му порача на Иванов да си молчи.
„Наш национален интерес е во ЕУ да влезе пријателска, а не антибугарска Македонија. Затоа Христо Иванов треба да биде љубезен и да молчи за Македонија. Ова што го кажа денеска може да биде секаков, но не бугарски интерес“, му порача Каракачанов преку Фејсбук.
Иванов претходно посочи дека Бугарија треба да покаже цврстина и, како што рече, да ја одбрани вистината, но воедно и да се изнајде решение за проблемот.
„Ние во овој парламент треба да го браниме бугарскиот национален интерес, да покажеме цврстина, но и смелост, за да најдеме решение за проблемот со Република Северна Македонија. Треба да се одбрани вистината, но треба да се најде начин заедно да станеме членови на европското семејство, бидејќи тоа е бугарски национален стратегиски интерес“, рече Иванов.
Денеска новиот состав на бугарскиот парламент одржа конститутивна седница, по парламентарните избори на 11 јули, на која за претседателка беше избарана пратеничката Ива Митева која доаѓа од редовите на „Има таков народ“.