Иако сè уште не е јасно дали американскиот рапер Канје Вест навистина поднел формално барање за влегување во претседателската трка, но тој вчера на Твитер објави дека ќе се кандидира на претседателските избори во ноември и ќе ги предизвика републиканецот Доналд Трамп и неговиот политички ривал, демократот Џо Бајден.

„Сега мора да го исполниме ветувањето на Америка верувајќи во Господ, обединувајќи ги нашите визии и градејќи ја нашата иднина. Се кандидирам за претседател на Соединетите Држави“, објави твит Вест со емотикон на американското знаме и хаштагот # 2020VISION.

Вест и неговата сопруга Ким Кардашијан неодамна го посетија Трамп во Белата куќа.

На средбата на претседателот и раперот во октомври 2018 година, Вест одржа чуден говор за паралелните универзуми и своето биполарно нарушување, за кое тврди дека всушност е недостаток на сон.

Најновата објава на Канје предизвика голем број реакции кај неговите 29 милиони следбеници.

Илон Маск, извршниот директор на Тесла го поддржа во својот пост на Твитер.

„Ја имаш мојата целосна поддршка“, му напиша Маск.