Канада планира да воведе дополнителни даноци за компаниите во секторот за дигитални услуги и производи како дел од новиот „фер даночен систем за дигиталната економија”, изјави канадската министерка за финансии, Криста Фриланд.

Од 1 јануари 2022 година данокот на промет на стоки и услуги ќе го плаќаат и големите странски компании, а Владата, исто така, директно ќе им наплаќа дигитален данок на компании кои овозможуваат дигитални услуги, покажуваат планираните измени.

Даноците можат да ги зголемат буџетските приходи за 3,4 милијарди канадски долари (2,6 милијарди американски долари) за пет години, истакна Фриланд за време на презентацијата на есенскиот извештај за состојбата во економијата.

Постоечкиот систем им наметнува даночно оптоварување на канадските потрошувачи кои го плаќаат преку ДДВ, нагласи канадската министерка.

– Ова им обезбедува неправедна предност на странските дигитални корпорации и ја намалува конкурентноста на канадските компании, додаде Фриланд.

Новиот данок се очекува да ги погоди компаниите, вклучувајќи ја и Алфабет и Епл, матичната компанија на Гугл, како и платформите за пренос на видео и аудио запис, како што се Спотифи и Нетфликс.

Дигиталните платформи за продажба, вклучително и продавниците за апликации, ќе плаќаат данок на промет на стоки и услуги од јули следната година, стои во предлогот на канадската Влада.

Извор:МИА