Големата фреквенција на возила, но и на огромни камиони, е стара болка на жителите на скопското село Петровец. Причина за таквиот сообраќаен метеж низ тесните улици е избегнување на патарината. Ова особено се актуализира откако се поправи и се преасфалтира стариот катлановски пат што оди накај Велес.

Жителите честопати протестираа за ваквата состојба. Минатата година ситуацијата ескалираше кога камион усмрти жена. По овој настан, жителите ја блокираа улицата, а меѓу нив застана и градоначалникот на Општина Петровец, Борче Митревски, кој побара транзитниот сообраќај да не се одвива низ нивното населено место, туку да се вози по автопат. Жителите од оваа населба собраа и 500 потписи за да го искажат својот револт и да побараат решение на проблемот.

Но, оттогаш ништо не е сменето. Во Петровец врие од сообраќај, како да е во центар на некоја голема метропола, а огромните камиони се редовна слика.

Побаравме одговор во Министерството за внатрешни работи во однос на законската регулатива, казните и инспекцискиот надзор за камионите што возат низ Петровец.

– На регионалниот пат Р1102 (Скопје – Петровец – Велес) има поставена сообраќајна сигнализација со која се ограничува движењето на товарниот сообраќај, за што учесниците во сообраќајот се должни да се придржуваат кон ограничувањата, забраните и обврските изразени со поставените сообраќајни знаци. Министерството во континуитет презема мерки против учесниците што постапуваат спротивно на законските прописи – велат од МВР.

Оттаму информираат дека 45 евра е глобата за оние што не се  придржуваат кон ограничувањата, забраните и обврските изразени со поставените сообраќајни знаци, во согласност со одредбите на Законот за безбедност на сообраќајот на патиштата.

Според упатените, оваа глоба е ниска и затоа фирмите се дрзнуваат да ги упатуваат камионите преку Петровец место преку патарината. Во зависност од големината на камионот, патарината на Петровец е 100, односно 150 денари.

Патарината, пак, за автомобили изнесува 40 денари. Но, што се однесува до сообраќајот со автомобили, проблематична е поставеноста на патарината кај Петровец, затоа што сигурно некој што живее во Катланово или во другите околни села, нема за секое одење во центарот на Скопје да плаќа патарина.