Трговската размена меѓу Македонија и земјите од Западен Балкан е во пораст, но таа би можела да биде уште поголема. Проблемот на сите влади во земјите од Западен Балкан е популизмот кој не им дозволува да работат на укинување на бариерите што постојат меѓу земјите – како што е долгото стоење на граница, меѓусебно непризнавање на документи и на сертификати, велат од Коморскиот инвестициски фонд, формиран во рамките на Берлинскиот процес за воспоставување на регионална соработка.

– Популизмот е голема болест во регионот, а тој се гради со бариерите кои се болка на економијата. Како можеме да зборуваме за интеграција ако немаме слободен проток на стоки, услуги и на луѓе? Сега на границите камионите чекаат по 10 и по 20 часа. А секој час е 2 евра. Како можеме да бидеме конкурентни ? Не треба да измислиме топла вода, туку само да го направиме она што го прави Европската унија во однос на протокот на стоки, услуги и луѓе – вели Сафет Ѓергалиу, генерален секретар на Коморскиот инвестициски форум.

Татјана Штериева, национален координатор на Коморскиот инвестициски фонд вели дека од неговото основање во 2015 година е забележан раст на трговската раземан во регионот.

– Во 2019 година, 10,1 отсто од вкупнит обем на трговска размена припаѓа на шесте земји од Западен Балкан, притоа учеството во извозот е 11,3 отсто, а во увозот е 9,2 отсто. Во 2015 година обемот на трговската размена со земјите од Западен Балкан бил 1,09 милијади евра, а во 2019 година бил 1,9 милијарди евра, односно зголемувањето на трговската размена е околу 400 милиони евра. Истото се однесува и на извозот. Извозот во земјите од регионот нa Западен Балкан во 2005 година бил 518,4 милиони евра, а во 2019 година достигнал 734 милиони евра, или се зголемил за 41 проценти – вели Штериева.