На глобално ниво, бројот на починати од ковид-19 надмина еден милион, но стручњаците сѐ уште се трудат да го сфатат клучниот мерен подарок кога е во прашање пандемијата – стапката на смртност, односно процентот на лицата заразени со патогенот, кои умираат од последици на болеста.

Ова е преглед на прашањата што би можеле да придонесат за подобро разбирање на стапката на смртност од ковид-19.

Како се пресметува стапката на смртност?

За да се пресмета реалната стапка на смртност, потребно е да се спореди бројот на починати со вкупниот број на заразени, а тоа е именител кој останува непознат, бидејќи е тешко да се измери целиот опсег на асимптоматски случаи.

Многу луѓе кои се заразуваат со новиот коронавирус, едноставно немаат симптоми.

Научниците тврдат дека вкупниот број на инфекции, експоненцијално е поголем од моменталниот број на потврдени случаи на заразата, а тој во моментот во светот изнесува повеќе од 33 милиони.
Многу стручњаци веруваат дека коронавирусот усмртува 0,5 отсто до 1 отсто од заразените лица, што го прави глобално многу опасен, додека не се пронајде ефикасна вакцина.

– Стапката на смртност кај лица помлади од 20 години, веројатно изнесува еден наспроти 10.000. Кај постарите од 85 години, смртно страда отприлика секој шести пациент – вели д-р Кристофер Мареј, директор на Институтот за метрика и евалуација на здравјето при Универзитетот „Вашингтон“ во Сиетл.

Што е стапка на смртност?

Очигледен е падот на стапката на смртност кога се мери во однос на бројот на новозаразени, потврдени со тестирање на коронавирусот.

Но, стручњаците сметаат дека воочениот пад е главно резултат на поголемиот број тестирања во споредба со тестирањата спроведени во првите денови од пандемијата, поради што и се откриваат повеќе заразени лица со благи симптоми на болеста или оние кои воопшто немаат симптоми.

На поголемиот број преживеани несомнено влијаеше и поквалитетниот начин на лекување на потешко заболените, како и подобрената заштита на ризичните групи.