Два дена по смртта на Џефри Епстајн, милијардерот обвинет за сексуално злоставување и трговија со малолетници, во медиумите кружат различни верзии за неговата смрт – од теории на заговор дека станува збор за нарачано убиство, до тврдења дека затворските чувари направиле сериозни пропусти во надзорот на Епстајн.

Додека првата верзија се сведува на претпоставки на Твитер, втората верзија би можела да биде повод за истрага која ја бараат се поголем број угледни Американци, сенатори и политичари.

Имено, нејасно е како Епстајн извршил самоубиство ако бил под специјални мерки на надзор за суицидни затвореници. Спомнатата мерка за милијардерот педофил е воведена откако пред две недели се обидел да се обеси во затворската ќелија. Тогаш животот му го спасил цимерот, бивши полицаец обвинет за киднапирање и убиство на четири лица, а Епстајн е префрлен во посебен дел од затворот каде беше сам во ќелијата и под константен надзор.

Една од непотврдените верзии кои може да се прочитаат во американските медиуми е дека чуварите не ја почитувале задолжителната процедура за надзор на суицидни затвореници која подразбира дека затвореникот во текот на вечерта треба да се надгледува на секои 30 минути.

Агенцијата АП, повикувајќи се на личност запознаена со работата во затворот, наведува дека дента кога Епстајн извршил самоубиство, неговите чувари работеле екстремно прекувремено, со цел да го надоместат недостатокот од персонал. Изворот рекол дека еден од чуварите работел прекувремено пет дена по ред, додека другиот имал обврски со прекувремена работа.