Како Интер ја прекина доминацијата на Јувентус во Серија А: Клучот на успехот е во неколку потези

epa09158805 Inter's Matteo Darmian (R) celebrates with teammates after scoring the 1-0 lead during the Italian Serie A soccer match between Inter Milan and Hellas Verona at Giuseppe Meazza stadium in Milan, Italy, 25 April 2021. EPA-EFE/MATTEO BAZZI

По 11 години пауза, Интер повторно е шампион на Италија.

На четири кола до крајот на првенството во Серија А, екипата на Интер ја обезбеди 19. шампионска титула, прва по пауза од 11 години.
„Нераѕурите“ до титулата дојдоа откако Аталанта одигра само 1:1 против Сасуоло со што на четири кола до крајот тимот од Бергамо има минус од недостижни 13 бодови. Ова е прва титула за Интер по пауза од 11 години, односно од сезоната 2009/10 кога предводени од Жозе Мурињо ја освоија титулата во Серија А. Во тој тим на Интер, настапуваше и капитенот на македонската репрезентација, Горан Пандев.

Навивалчите на Интер ја прославуваат титулата/EPA-EFE/Mourad Balti Touati

Анализата за тоа како Антонио Конте успеа да ја прекине деветгодишната доминација на Јувентус, ја направи шпанска „Марка“.
За шпанскиот спортски весник нема дилеми, најзаслужен за освојување на титулата е тренерто Антонио Конте. Темпераментниот тренер го презеде Интер откако во сезоната 2018/19 екипата заврши на четвртото место со 11 бодови заостаток зад Јувентус.
– Не сум магионичар и немам волшебно стапче. Разликата помеѓу нас и Јувентус е преголема – беа зборовите на Конте по доаѓањето во Интер.
Тој во првата сезона не успеа да направи чудо како што му успеа со Челси и Јувентус во минатото, но веќе во втората сезона ја освои титулата. Неговиот рецепт за успех е формацијата 3-5-2 од која не отстапи ниту еден момент.

EPA-EFE/CARMELO IMBESI

Иако не го намалува успехот на Конте, „Марка“ пишува дека Интер го има најдобриот тим во Серија А, а за неговото составување во последните две години беа потрошени речиси 300 милиони евра за засилувања како Лукаку, Хакими, Барела, Видал, Алексис Санчез.

Филозофијата на Конте е цврстата одбрана и тоа го докажа уште во првата сезона во Интер кога екипата имаше најмалку примени голови, а и оваа сезона се на добар да го повторат тој успех. Моментно Интер на 34 натпревари прими само 29 голови, а за овој успех најзаслужна е тројката Шкринијар-Де Вриј-Бастони кои се незаменливи сезонава.
Иако Интер не успеа да ја помине групната фаза во Лигата на шампионите, тоа се покажа доста корисно бидејќи Конте и фудбалерите имаа повеќе време за одмор и за подготовка пред натпреварите во Серија А. Така успеаја да направат серија од дури 11 победи по ред, што е втора најдобра серија во клупската историја, но во исто време успеаја да соборат нов рекорд. Интер оствари 14 победи на домашен терен сезонава.
Победничката серија на „нераѕурите“ започна со победата од 2:0 над најголемиот ривал Јувентус кога на сите им стана јасно дека овој тим е подготвен за освојување на титулата.
Конте летово погоди и со засилувањата, Ашраф Хакими се покажа како еден од најдобрите дефанзивци во Серија А и сезонава постигна дури седум гола, а има и седум асистенции. Покрај него и Де Вриј, голем напредок во играта беше забележан кај Николо Барела.

EPA-EFE/ELISABETTA BARACCHI

Исто така голем придонес во освојувањето има и длабоката клупа, односно широкиот ростер со кој располага Конте. Ова посебно се однесува за Кристијан Ериксен кој беше на прагот на заминување од „Џузепе Меаца“ но, од почетокот на оваа година игра одлично и се наметна како еден од најважните играчи во системот на Конте. Голем придонес има и Алексис Санчез кој како замине за Лаутаро Мартинез даде пет гола и имаше уште шест асистенции. Покрај Ериксен и Санчез, одлични партии влегувајќи од клупата прикажаа и Дармијан и Перишиќ кои заедно дадоа шест гола и имаат седум асистенции.

Лукаку и Мартинез блескаа во нападот на Интер/EPA-EFE/MATTEO BAZZI

Но, се чини дека најголеми заслуги за титулата има фантастичниот напад. Ромелу Лукаку без сомнение е најдобриот фудбалер во Серија А оваа сезона давајќи 21 гол и има уште 10 асистенции. Покрај него, одлична сезона има и Лаутаро Мартинез кој даде 15 гола. Но, неговиот учинок добива на тежина доколку се знае дека Конте токму него највеќе пати го замени сезонава, дури 20 пати.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот