Како држава сме спремни и за мечеви од висок ризик!
Од ФФМ се заблагодаруваат што во толкав број покажаа навивачите како се сака и се бодри нашата репрезентација со срце, и во победите, но и во поразите.
– Искрена благодарност и до сите служби кои беа вклучени во беспрекорната организација на натпреварите. Особена благодарност до Министерството за Внатрешни работи и службите на Националната Арена Тодор Проески. Сите оценки од страна на УЕФА укажуваат на тоа дека ние како држава сме подготвени на највисоко ниво да организираме натпревари оценети како висок ризик, и со тоа да бидеме пример за останатите земји и федерации во регионот и во Европа – велат од ФФМ.
Потсетување дека во овие два дуели во Скопје, поризичен беше оној против Полска минатиот петок кога нивните навивачи меѓусебно физички се пресметуваа во главниот град.
Исто така полни раце работа имаше и Министерството за внатрешни работи, имаше парични казни за 223 полски приведени навивачи.
Од ФФМ воедно се надеваат дека и во иднина ќе ја имаат поддршката од навивачите и од службите кои беа дел од тимот на организација на натпреварите, дека ќе се покаже сплотеност на теренот, но и надвор од него – обединети во радоста која ја носи фудбалот!