До кога во образованието ќе одлучуваат луѓе кои не поминале ниту еден ден пред зелената табла со креда во рака? – се прашува наставникот во основно училиште од Прилеп, Гоце Бумбароски, кој е револтиран од тоа што Министерството за образование и наука (МОН) им забранило на учениците да пишуваат во учебникот по математика за четврто одделение.

„Минатата недела конечно добивме учебници по Македонски јазик и Математика за IV одделение, по три месеци од почетокот на учебната година. Ден – два потоа пристигна допис (информација) од МОН дека учениците не смеат да пишуваат во учебникот по математика. Три месеци работиме без учебници и откако пристигнаа – не смее да се пишува во нив, каква иронија…“, пишува Бумбароски на Фејсбук.

Тој прашува зошто не смее да се пишува, кога и самите учебници се направени така што бараат во нив да се пишуваат решенијата на задачите.

„Нели се конципирани во форма на работни тетратки каде што зададените задачи и активности меѓу другото налагаат и решавање во самата книга? Дури и текстовите на задачите се насочени во тој правец. Ги повикувам од МОН на чело со министерот да си ја преиспитаат оваа несериозна одлука и ведаш ја повлечат. На моите ученици нема да им го скратам правото да пишуваат во учебниците. Тие се за нив и ќе ги користат онака како што треба“, пишува Бумбароски.