Подземен комплекс издлабен во карпа пред речиси 2.000 години е откриен близу Ѕидот на плачот во Ерусалим, објавија израелските археолози.

Комплексот се состои од неколку простории и отворен двор, а се верува дека го користеле жителите на Ерусалим пред Римјаните во 70. година по опсадата на градот да го уништат Вториот храм.

Истражувачите ова откритие  го нарекоа „неверојатен пронајдок“ и додадоа дека се уште не се знае зошто служела таа градба која пред 1.400 години, во времето на Бизант, е покриена со друга зграда.

„Прашање е зошто толку труд и материјали се искористени за кршење и обликување на подземните простори во тврдата карпа?“ соопштија Барак Моникендам – Гивон и Техила Садиел, водач на ископувањето.

Во комплексот се пронајдени неколку предмети како кујнски прибор, остаток од маслени лампи и делови од камена чинија која се користела во еврејските ритуали.